18મી સદીની ‘અત્યંત દુર્લભ’ ચાઈનીઝ ફૂલદાની જે લગભગ ચાર દાયકાઓ સુધી પરિવારના રસોડામાં રાખવામાં આવી હતી તે હવે 1.2 મિલિયન પાઉન્ડ (લગભગ 11.53 મિલિયન રૂપિયા)માં વેચાઈ છે.
લગભગ 2 ફૂટ ઊંચી, વાદળી-ચમકદાર ચાંદી અને ગિલ્ટ ફૂલદાની અગાઉના માલિકના સ્વર્ગસ્થ પિતા દ્વારા ખરીદવામાં આવી હતી.
તેણે 1980ના દાયકામાં આ ફૂલદાની ખરીદી હતી કારણ કે તેને તે આકર્ષક લાગી હતી.
અગાઉ તેના માલિકને આ ફૂલદાનીની કિંમત ખબર ન હતી. તે તેનો ઉપયોગ ઘરની સજાવટ માટે જ કરતો હતો. આ ફૂલદાની બ્રિટનના મિડલેન્ડ્સમાં રહેતા એક પરિવારના રસોડાને શણગારતી હતી.
આ ફૂલદાનીમાં થોડી તિરાડ પડ્યા પછી, પરિવારે તેને રસોડામાંથી કાઢીને ડાઇનિંગ રૂમમાં રાખવાનું નક્કી કર્યું. તે જ સમયે, એન્ટિક એક્સપર્ટની નજર પડ્યા પછી તે પરિવારને આ ફૂલદાનીના મહત્વ વિશે જાણ થઈ.
આ જ એન્ટિક નિષ્ણાતે 18મી સદીના રાજા કિયાનલોંગના સમયની આ ફૂલદાનીના પાયા (નીચેના ભાગ) પર 6-અક્ષરની મહોર જોઈ હતી. ત્યારબાદ તેણે નિર્દેશ કર્યો કે તે કદાચ 18મી સદીના મધ્યમાં રાજાના મહેલના હોલમાં પ્રદર્શિત કરવામાં આવી હતી.
જે પછી માલિકે તેને ન્યુબરી, બર્કશાયરના હરાજી કરનાર ડ્રવેટ્સ પાસે વેચાણ માટે મૂકી. અગાઉ તેની કિંમત £1,00,000 થી £1,50,000 (લગભગ રૂ. 96 લાખથી રૂ. 1 કરોડ 44 લાખ) સુધીની જ જણાવવામાં આવી રહી હતી.
પરંતુ એક અતિ સમૃદ્ધ ચીનીએ તેને 1.2 મિલિયન પાઉન્ડ (લગભગ 11.53 મિલિયન રૂપિયા)માં ખરીદી. તે પોતાનો ખોવાયેલો વારસો પાછો ખરીદવા આતુર હતો, જેના કારણે તેણે આ ફૂલદાની પર આટલા પૈસા ખર્ચ્યા.
આ ફૂલદાની સોના અને ચાંદીથી જડેલી છે અને તેના પર ‘આઠ અમર’ પ્રતીક છે, જેને દીર્ઘાયુ અને સમૃદ્ધિનું પ્રતીક માનવામાં આવે છે.